Ammassallip kommuniani nunaqarfinni imigassanik aalakoornartulinnik nioqquteqarneq pillugu Namminersornerullutik Oqartussat nalunaarutaat nr. 21, 16. august 2000-imeersoq.
Imigassanik aalakoornartulinnik nioqquteqarneq sassaallertarnerlu pillugit inatsisartut inatsisaanni nr. 23-mi, 30. oktober 1992-imeersumi § 28, imm. 1, nr. 3 aamma 29, imm. 3 naapertorlugit aalajangersarneqarput:
§ 1. Nalunaarut una Ammassallip kommuniani nunaqarfinnut Tiniteqilaamut, Sermiligaamut Isortumullu atuuppoq.
§ 2. Nunaqarfinni Tiniteqilaami, Sermiligaami Isortumilu imigassat kimikinnerit killilersugaanngitsumik nioqqutaasinnaapput.
§ 3. Nunaqarfinni Tiniteqilaami, Sermiligaami Isortumilu immiaaqqat 4,10 % sinnerlugulu aalakoornartullit killilersugaanngitsumik nioqqutaasinnaapput.
Imm. 2. Imigassanik aalakoornartulinnik allanik pisisinnaaneq taamaallaat siumut inniminneeqqaarluni pisinnaavoq.
§ 4. Aammattaaq nioqquteqarnermut atuupput imigassanik kimittuunik kimikitsunillu nioqquteqarnissamut piffissarititaasut pillugit naalakkersuisut aalajangersagaat.
Imm. 2. Aammattaaq imigassanik siumut inniminneriikkanik tunniussineq nioqquteqarnissamut piffissarititaasut aalajangersakkat iluanni taamaallaat pisinnaavoq.
§ 5. §§ 3, imm.2, amma 4-imik unioqqutitsinerit akiliisitsissutaasinnaapput.
§ 6. Nalunaarut una 1. september 2000-imi atuutilissaaq.
Imm. 2. Tamatumunnga peqatigitillugu Tasiilap kommuniani nunaqarfinni imigassanik aalakoornartulinnik nioqquteqarneq pillugu Namminersornerullutik Oqartussat nalunaarutaat nr. 3, 13. februar 1997-imeersoq atorunnaarsinneqarpoq.
Namminersornerullutik Oqartussat, 16. august 2000.
Simon Olsen
/
Jørn Birk Olsen